وحدت اسلامی آج ایران کی اندرونی سطح سے گذر کر عالمی سطح تک پہنچ گئی ہے

بین الاقوامی اہل بیت(ع) نیوز ایجنسی ـ ابنا ـ کی رپورٹ کے مطابق، عالمی فورم برائے تقریب مذاہب اسلامیہ کے سیکرٹری جنرل حجت الاسلام والمسلمین حمید شہریاری نے آج سنیچر (6 ستمبر 2025) کو دوپہر میں بین الاقوامی اسلامی مذاہب یونیورسٹی میں منعقدہ انتالیسویں بین الاقوامی اسلامی وحدت کانفرنس کے پریس بریفنگ میں ہفتہ وحدت کے موقع پر مبارکباد دیتے ہوئے کہا: "اس سال حضرت محمد مصطفیٰ (صلی اللہ علیہ و آلہ) کی ولادت با سعادت کے ڈیڑھ ہزارویں سالگرہ کے موقع پر منائی جا رہی ہے، اور امسال وحدت کانفرنس کا عنوان "نبی الرحمہ و امۃ واحدہ" ہے جو کل سے اپنا کام شروع کر چکی ہے۔"
انہوں نے وحدت کے تصور اور گذشتہ 39 سالوں کے دوران عالمی سفارتی حکمت عملی پر اس کانفرنس کے  اثرات کی طرف اشارہ کرتے ہوئے کہا: "آج وحدت کا دائرہ انقلاب کے ابتدائی دور کے مقابلے میں کہیں زیادہ وسیع ہو چکا ہے۔ تقریب مذاہب آج عملی اور سفارتی میدان میں ایک حقیقت بن چکی ہے۔ ہم دیکھ رہے ہیں کہ انقلاب کے دو رہنماؤں امام خمینی (قُدِّسَ سِرُّہُ الشَّرِیف) اور رہبر معظم امام خامنہ ای (مد ظلہ العالی) کی حکمت عملی کے تحت اسلامی مذاہب کے تقریب آج مذہبی اور عوامی سفارت کاری کے میدان میں مجسم ہو چکی ہے۔