اہل بیت(ع) نیوز ایجنسی ـ ابنا ـ کے مطابق، مجلس وحدت مسلمین بلوچستان کے صوبائی نائب صدر و امام جمعہ علامہ علی حسنین حسینی نے اتحاد بین المسلمین کی ضرورت و اہمیت پر زور دیتے ہوئے کہا ہے کہ ہفتہ وحدت اتحاد بین المسلمین کے فروغ کا بہترین موقع ہے۔
ان کا کہنا تھا کہ 12 سے 17 ربیع الاول کے دوران پیغمبر اسلام حضرت محمد (صلی اللہ علیہ وآلہ) کے جشن ولادت پر تمام مسلمان اتحاد کا مظاہرہ کریں۔
انہوں نے کہا کہ مجلس وحدت مسلمین اتحاد بین المسلمین کی علمبردار جماعت ہے اور ہم روز اول سے پاکستان میں اتحاد کے ذریعے نفرتوں کو ختم کرنے کی کوشش میں مصروف ہیں اور اتحاد بین المسلمین ہمارے بنیادی مقاصد میں سے ایک ہیں۔
انہوں نے کہا کہ پیغمبر اسلام (ص) سے محبت و عقیدت ہمارے لئے وحدت کا مرکز ہے، ہمیں آنحضرت کی سیرت پر عمل پیرا ہوکر اپنے مسلمان بھائیوں سے حسن سلوک سے پیش آنا چاہئے۔
انہوں نے کہا کہ دوسروں مسلمانوں کے ساتھ دوستانہ رویہ اپنانے اور اتفاق و اتحاد کے فروغ سے ہی مستقبل بہتری کی طرف جائے گا؛ ہماری یکجہتی ہی ہماری بڑی قوت ہے۔ ہمارا اتحاد ہمیں اور ہمارے ملک کو مضبوط بنائے گا۔
انہوں نے مزید کہا: ماہ ربیع الاول پیغمبر اسلام (صلی اللہ علیہ وآلہ) کی ولادت کا مہینہ ہے؛ جس کے دوران، 12 سے 17 ربیع الاول کے درمیانی ایام کو ہفتہ وحدت کے طور پر منایا جا تا ہے۔ چنانچہ تمام محبان رسول(ص) کو چاہئے کہ اس مہینے سے فائدہ اٹھاتے ہوئے آخری نبی کے پیغام کو فروغ دیں اور ایک دوسرے کو گلے لگائیں۔ کیونکہ ایک دوسرے کا احترام کرکے ہی غلط فہمیوں کو دور کیا جا سکتا ہے۔
۔۔۔۔۔۔
110
