پاکستان اور بھارت صورتحال مزید خراب نہ کریں،امریکا

اہل بیت(ع) نیوز ایجنسی ابنا کے مطابق، ایک سوال پر ٹیمی بروس کا کہنا تھا کہ امریکی وزیر خارجہ مارکو روبیو پاکستان اور بھارت کے وزرائے خارجہ سے آج یا کل بات کریں گے، وہ دیگر قومی رہنماؤں اور وزرا خارجہ کی بھی حوصلہ افزائی کررہے ہیں کہ وہ بھی اس مسئلہ پر پاکستان اور بھارت سے رابطہ کریں۔

ترجمان محکمہ خارجہ نے مزید کہا کہ اس معاملے پر روزانہ کی بنیاد پر اقدامات کیے جارہے ہیں، پاکستان اور بھارت میں اپنے ہم منصب سے وزیر براہِ راست بات کررہے ہیں اور توقع ہے کہ یقیناً اس کا ویسا ہی اثر ہوگا جیسا کہ وزیر دیگر لوگوں سے بات کرتے ہیں۔

ٹیمی بروس نے کہا کہ صدر ٹرمپ کی قیادت کی موجودگی میں یقیناً پاکستان اور بھارت کے لیے وہ بات چیت اہم ہے۔

ایک اور سوال پر ٹیمی بروس کا کہنا تھا کہ امریکا صورتحال پر نظر رکھے ہوئے ہے، دونوں فریقوں سے کہا جارہا ہے کہ وہ زمہ دارانہ حل نکالیں کیونکہ دنیا یہ صورتحال دیکھ رہی ہے۔

انہوں نے کہا کہ اس لمحہ سب سے اہم یہ ہے کہ وزیر خارجہ مارکو روبیو کی بات چیت کا نتیجہ نکلے۔

واضح رہے کہ گزشتہ ہفتے مقبوضہ کشمیر کے علاقے پہلگام میں ایک دہشتگرد حملے میں 26 بھارتی سیاحوں کو قتل کیا گیا تھا جس کے بعد پاکستان اور بھارت کے درمیان تناؤ بڑھ گیا ہے۔