اہل بیت(ع) نیوز ایجنسی ـ ابنا ـ کے مطابق، حماس نے اتوار کی صبح بتایا کہ قیدیوں کے تبادلے کے معاہدے کے تحت غاصب ریاست کے عقوبت خانوں سے رہا ہونے والے قیدی اسیر پہنچ گئے ہیں، اور حماس کے رہنماؤں، مختلف فلسطینی گروہوں کے عہدیداروں اور قیدیوں کے اہل خانہ نے ان کا استقبال کیا۔
شہداء، اسیروں اور زخمیوں کے امور کے لیے حماس کے دفتر کے انچارج زاہر جبارین نے قاہرہ میں رہائی پانے والے جلاوطنوں کے لیے ایک استقبالیہ کے دوران کہا کہ "تبادلے کے معاہدے کے فریم ورک کے اندر اسیروں کی رہائی فلسطینی عوام کی دلیرانہ مزاحمت کی تاریخی فتح ہے۔ اس جنگ سے ثابت ہؤا کہ ہماری قوم غاصب کے چنگل سے اپنے حقوق چھیننے کی صلاحیت رکھتی ہے خواہ دشمن کتنا ہی سرکش کیوں نہ ہو"۔
زاہر جبارین نے کہا کہ اسیروں کی رہائی کا یہ موقع ایک قومی جشن ہے جو فلسطینی اتحاد کی نمائندگی کرتا ہے۔
انہوں نے زور دے کر کہا: ہماری قوم کی یکجہتی اور مزاحمت ہی مکمل آزادی اور قومی وقار کے حصول کا واحد راستہ ہے۔ ہماری قوم کی ثابت قدمی اور قربانی، خاص طور پر غزہ میں، اس کامیابی کا بنیادی ستون تھا جو مزاحمت اور قوت ارادی کا ناقابل تسخیر قلعہ ثابت ہؤا۔
زاہر جبارین نے غزہ کی تعمیر نو کی ضرورت پر بھی زور دیا۔
