یوکرینی صدر ولودومیر زیلینسکی کی روس سے جنگ ختم کرنے کی حمایت!

اہل بیت(ع) نیوز ایجنسی ـ ابنا | برطانوی نشریاتی ادارے بی بی سی کی رپورٹ کے مطابق اپنے ایک بیان میں ولودومیر زیلینسکی نے کہا ہے کہ اُمید ہے ڈونلڈ ٹرمپ کی جانب سے امریکی صدارت سنبھالنے پر روس یوکرین جنگ جلد ختم ہو جائے گی اور نئی امریکی انتظامیہ یقینی بنائے گی کہ جنگ ختم ہو جائے۔
یوکرینی صدر کا کہنا ہے کہ انہوں نے ٹرمپ کے ساتھ امریکی صدارتی انتخابات میں ان کی جیت کے بعد ٹیلی فونک گفتگو میں روس کے خلاف جنگ کے حوالے سے تبادلہ خیال کیا تھا۔

انہوں نے یہ واضح نہیں کیا کہ آیا ٹرمپ نے روس کے ساتھ ممکنہ مذاکرات کے حوالے سے کوئی مطالبات کیے لیکن یہ ضرور کہا کہ انہیں ٹرمپ کی طرف سے کوئی ایسی بات نہیں سننے کو ملی جو یوکرین کے مؤقف کے خلاف ہو۔

دوسری جانب جرمن چانسلر اولاف شولز کا روس کے صدر پیوٹن سے 2 برس بعد فون پر رابطہ ہوا ہے۔

روس کے صدر نے کہا تھا کہ انہوں نے مذاکرات سے کبھی انکار نہیں کیا، یوکرین رکاوٹ بنا تھا۔

ان کا کہنا تھا کہ ماسکو اب بھی بات چیت بحال کرنے کے لیے تیار ہے، مگر معاہدے کے لیے تنازع کی جڑ ختم کی جائے۔

۔۔۔۔۔

ٹرمپ کے انتخاب کے بعد، ٹرمپ ہی کا ایک وائس ریکارڈ لیک ہؤا جس میں ٹرمپ نے کہا تھا کہ میں چارج سنبھالتے ہی یوکرین کی جنگ کو ختم کروں گا اور اگر زیلینسکی  مقبوضہ علاقے چھڑانا چاہتا ہے، تو خود ہی لڑ کر چھڑا دے۔ یہ بھی خبر ہے کہ ٹرمپ انتظامیہ یوکرین میں قبل از وقت انتخابات کرانے کا ارادہ رکھتی ہے تاکہ روس کے ساتھ مذاکرات کے لئے زیلنسکی کی جگہ کوئی اعتدال پسند شخص صدر بن جائے۔ ان خبروں کے بعد یوکرین میں تشویش کی لہر دوڑ گئی ہے اور زیلینسکی کا لب و لہجہ بھی ان دنوں خوف اور تشویش اور مرتی ہوئی امیدوں کا امتزاج بنا ہؤا ہے۔

۔۔۔۔۔۔

110