ایران امام مہدی کی حکومت ہے:شیخ نعیم قاسم
حزب اللہ لبنان کے سیکریٹری جنرل شیخ نعیم قاسم نے کہا ہے کہ اسلامی جمہوریہ ایران، امام زمانہ حضرت مہدیؑ کی حکومت ہے اور مزاحمتی تحریک ظہورِ امام مہدیؑ میں تعجیل کا ذریعہ بن رہی ہے۔
شیخ نعیم قاسم نے قم میں واقع مسجدِ مقدس جمکران میں شبِ نیمہ شعبان کی تقریب سے ویڈیو خطاب کرتے ہوئے مہدویت، ولایت اور مزاحمت کے باہمی تعلق پر زور دیا۔ انہوں نے کہا کہ اسلامی انقلابِ ایران، ظہورِ امام مہدیؑ کے لیے زمین ہموار کرنے والا ایک الٰہی منصوبہ ہے۔
انہوں نے کہا کہ امام مہدیؑ دنیا بھر کے مظلوموں کے لیے امید کی علامت اور زمین پر عدل و انصاف کے قیام کا خدائی وعدہ ہیں۔ موجودہ دور میں جب دنیا ظلم، استکبار اور طغیان سے بھر چکی ہے، انسانیت کو پہلے سے کہیں زیادہ امام مہدیؑ کی قیادت کی ضرورت ہے۔
حزب اللہ کے سربراہ نے کہا کہ ظہور سے قبل امتِ مسلمہ کو مضبوط، قربانی دینے والی اور جہاد کے لیے تیار ہونا ہوگا، جبکہ قیادت کو پاکیزہ، بہادر اور ایثار پیشہ ہونا چاہیے۔ ان کے بقول آج یہ صفات اسلامی امت میں نمایاں طور پر پروان چڑھ رہی ہیں۔
شیخ نعیم قاسم نے اسلامی انقلابِ ایران کو انتظارِ حقیقی کی راہ میں ایک غیرمعمولی کامیابی قرار دیتے ہوئے کہا کہ امام خمینیؒ کی قیادت میں قائم ہونے والی اسلامی جمہوریہ، عالمی طغیان کے دور میں ایک عظیم پیش رفت تھی، جسے آج رہبرِ انقلاب آیت اللہ سید علی خامنہ ای کی قیادت میں طاقت کے ساتھ آگے بڑھایا جا رہا ہے۔
انہوں نے واضح الفاظ میں کہا کہ اسلامی جمہوریہ ایران، امام زمانہؑ کی حکومت ہے اور بالآخر اس انقلاب کا پرچم امام مہدیؑ کے ہاتھوں میں دیا جائے گا۔
انہوں نے لبنان، فلسطین اور خطے میں مزاحمتی محاذ کی تشکیل کا ذکر کرتے ہوئے کہا کہ مزاحمت کی تحریک امام خمینیؒ کی ہدایت سے وجود میں آئی اور آج ہر مجاہدِ مزاحمت خود کو امام مہدیؑ کا سپاہی سمجھتا ہے۔
شیخ نعیم قاسم نے شہداء کی قربانیوں کو خراجِ تحسین پیش کرتے ہوئے کہا کہ شہداء نے اپنی جانیں قربان کر کے امام عصرؑ سے وفاداری ثابت کی اور ان کا خون ظہور کے قافلے میں امت کی شمولیت کی راہ ہموار کر رہا ہے۔
انہوں نے کہا کہ امام مہدیؑ کا راستہ، ولایت کا راستہ ہے اور ولی فقیہ کی قیادت کی اطاعت، امریکہ اور صیہونی رژیم کے خلاف ڈٹ جانا اور مزاحمت کی راہ میں قربانی دینا، حقیقی انتظار کی نمایاں علامتیں ہیں۔
خطاب کے اختتام پر انہوں نے مسجد جمکران کی روحانی اہمیت پر روشنی ڈالتے ہوئے اسے امام زمانہؑ کی معنوی موجودگی سے قریب ترین مقامات میں سے ایک قرار دیا اور مومنین کو وہاں دعا اور حاضری کی تلقین کی۔
آخر میں، شیخ نعیم قاسم نے دعا کی کہ اللہ تعالیٰ اپنے ولی کے ظہور میں تعجیل فرمائے اور ہمیں امام مہدیؑ کے یاروں، مددگاروں اور شہداء میں شامل کرے۔
آپ کا تبصرہ