اہل بیت (ع) نیوز ایجنسی ابنا کے مطابق، محمود خان اچکزئی نے ترجمان تحریک تحفظ آئین پاکستان آخونزادہ حسین احمد کے ہمراہ زیرِ تعمیر یونیورسٹی کا معائنہ کیا۔ اس موقع پر انہیں یونیورسٹی کے مختلف شعبہ جات، تدریسی منصوبہ بندی اور آئندہ تعلیمی اہداف پر تفصیلی بریفنگ دی گئی۔
دورے کے دوران قومی اسمبلی میں قائدِ حزبِ اختلاف نے یونیورسٹی میں زیرِ تعمیر جامع مسجد کا بھی جائزہ لیا اور تعمیراتی معیار، منصوبہ بندی اور انتظامی نظم و ضبط کو سراہا۔ ان کا کہنا تھا کہ اس نوعیت کے علمی اور دینی منصوبے معاشرے میں فکری بالیدگی، شعور اور اخلاقی اقدار کے فروغ میں اہم کردار ادا کرتے ہیں۔
اس موقع پر گفتگو کرتے ہوئے محمود خان اچکزئی نے کہا کہ انہیں یہ جان کر دلی مسرت ہوئی کہ سینیٹر علامہ راجہ ناصر عباس جعفری نے اصولی سیاست کے ساتھ ساتھ ایک عظیم علمی و دینی مرکز کی بنیاد رکھ کر علم و آگہی کے فروغ کا عملی ثبوت فراہم کیا ہے۔ ان کے مطابق ایسے علماء اور سیاسی رہنما معاشرے کے لیے مشعلِ راہ کی حیثیت رکھتے ہیں۔
انہوں نے مزید کہا کہ یہ تعلیمی ادارہ نہ صرف دینی علوم کے فروغ میں کردار ادا کرے گا بلکہ عصری تقاضوں سے ہم آہنگ تعلیم کے ذریعے آنے والی نسلوں کی فکری اور اخلاقی تربیت میں بھی مؤثر ثابت ہوگا۔
آپ کا تبصرہ