اہل بیت(ع) نیوز ایجنسی ـ ابنا ـ کے مطابق یمن میں انقلاب کے روح رواں اور وہاں کی مقاومتی تحریک "انصار الله" کے قائد "سید عبدالملک الحوثی" نے کہا: ہماری فورسز کی جانب سے مقبوضہ فلسطین میں انجام پانے والا حملہ انتہائی جدید ٹیکنالوجی کے حامل میزائل سے کیا گیا۔
انہوں نے ان خیالات کا اظہار پیغمبر اکرم (صلی اللہ علیہ و آلہ) کی ولادت با سعادت کی مناسبت سے ایک تقریب سے خطاب سے کیا۔ اس موقع پر انہوں نے کہا کہ آج کی کارروائی میں استعمال ہونے والے میزائل کی مار 2040 کلومیٹر تک ہے اور مذکورہ میزائل حملہ صہیونی ریاست کے ساتھ محاذ آرائی کے 5ویں مرحلے میں کیا گیا۔
سید عبدالملک الحوثی نے دو ٹوک انداز میں کہا: جب تک صہیونی ریاست غزہ کا محاصرہ اور غزہ پر جنگ جاری رکھے گی تب تک یمنی افواج اپنی کارروائیاں بند نہیں کریں گی اور جب تک کہ فلسطین کی سرزمین سے صہیونی قبضہ ختم نہیں ہو جاتا ہم اپنے موقف پر ڈٹے رہیں گے۔
تحریک انصار الله کے قائد نے کہا: یمنی افواج مقاومتی محاذ کے ساتھ تعاون جاری رکھیں گی؛ صہیونی ریاست کے لئے آئندہ آنے والے واقعات اس سے بھی زیادہ سخت اور ناقابل برداشت ہوں گے۔
سید عبدالملک الحوثی نے کہا کہ ہماری فورسز بحیرہ احمر میں صہیونی، امریکی اور برطانوی بحری جہازوں کو نشانہ بناتی رہیں گی اور یہ کارروائیاں کامیاب اور مؤثر ہوں گی۔
انہوں نے کہا کہ مسلمانوں کو چاہئے کہ وہ ایمانداری، ہوشیاری اور مستعدی کے ساتھ فلسطین کی حمایت میں اپنی ذمہ داریاں نبھا دیں۔ مسلمانوں کو چاہئے کہ وہ عقل کا سہارا لیں اور اسٹریٹجک سطح پر ہوشیاری کے ساتھ معاملات کو سنبھالیں۔ ہم اپنی قوم کی جانب سے ظلم و استکبار کے مقابلے میں اپنے جہادی و اصولی موقف پر جم کر رہنے کا یقین دلاتے ہیں۔
۔۔۔۔۔۔
110
