اہل بیت نیوز ایجنسی ابنا کی رپورٹ کے مطابق، لبنانی ذرائع ابلاغ نے پیر کے روز اطلاع دی ہے کہ سید عبد الکریم نصراللہ، حزب اللہ لبنان کے سابق سیکرٹری جنرل سید حسن نصراللہ کے والد، انتقال کر گئے ہیں۔
لبنانی اخبار النهار کے مطابق، سید عبد الکریم نصراللہ کا انتقال اپنے فرزند سید حسن نصراللہ کی شہادت کے تقریباً ڈیڑھ سال بعد ہوا۔ اس سے قبل سید حسن نصراللہ کی والدہ نہدیہ صفی الدین بھی جون 2024 میں وفات پا چکی تھیں۔
سید عبد الکریم نصراللہ کا تعلق جنوبی لبنان کے علاقے صور کے نواحی گاؤں البازوریہ سے تھا، بعد ازاں وہ بیروت منتقل ہو گئے تھے۔ ان کے 9 بچے تھے، جن میں 4 بیٹے اور 5 بیٹیاں شامل ہیں۔ سید حسن نصراللہ ان کے سب سے بڑے فرزند تھے۔
واضح رہے کہ 6 اکتوبر 2024 کو اسرائیلی فوج نے بیروت کے جنوبی علاقے ضاحیہ میں حزب اللہ کے مرکزی دفتر پر شدید فضائی حملہ کیا تھا، جس کے نتیجے میں سید حسن نصراللہ شہید ہو گئے تھے۔
سید حسن نصراللہ، حزب اللہ لبنان کے تیسرے سیکرٹری جنرل تھے۔ وہ 31 اگست 1960 کو پیدا ہوئے اور فروری 1992 میں اسرائیلی حملے میں سید عباس الموسوی کی شہادت کے بعد حزب اللہ کی قیادت سنبھالی۔
انہوں نے لبنان، عراق اور ایران کے دینی مدارس میں تعلیم حاصل کی۔ ان کی قیادت میں حزب اللہ نے اسرائیل کے خلاف نمایاں عسکری کارروائیاں کیں، جن کا عروج سال 2000 میں دیکھنے میں آیا، جب 18 سالہ قبضے کے بعد اسرائیلی فوج کو جنوبی لبنان سے پسپا ہونا پڑا۔
سید حسن نصراللہ نے 2004 میں اسرائیل کے ساتھ قیدیوں کے تبادلے میں بھی اہم کردار ادا کیا، جسے خطے کی تاریخ کے بڑے تبادلوں میں شمار کیا جاتا ہے۔
2006 کی 33 روزہ جنگ کے دوران ان کی مقبولیت میں غیر معمولی اضافہ ہوا، جب اسرائیلی افواج بھاری نقصان اٹھا کر پیچھے ہٹنے پر مجبور ہوئیں۔
ان واقعات کے بعد سید حسن نصراللہ مزاحمت کی علامت اور مشرق وسطیٰ میں مغربی اثر و رسوخ کے خلاف ایک نمایاں شخصیت بن کر ابھرے۔ عرب دنیا میں لاکھوں افراد ان کی پرجوش اور اثر انگیز تقاریر کو باقاعدگی سے سنتے تھے۔
آپ کا تبصرہ