ابنا: مجلس وحدت مسلمین بلوچستان کے سربراہ علامہ مقصود علی ڈومکی نے 13 جولائی کو منعقد ہونے والی اتحاد بین المسلمین و آزادی بیت المقدس و فلسطین کانفرنس کے سلسلے میں جمعیت اتحاد العلماء کے ڈاکٹر عطا الرحمان، جماعت الدعوہ بلوچستان کے صوبائی امیر حافظ محمد قاسم، بی این پی کے رہنماء غلام نبی مری، جمعیت اہل حدیث کے صوبائی رہنماء نجیب اللہ عابد, پاکستان سنی تحریک کے رہنماء علی بلوچ اور ڈاکٹر فیض ہاشمی کو دعوت دی۔ اس موقعہ پر گفتگو کرتے ہوئے علامہ مقصود علی ڈومکی نے کہا کہ غزہ میں اسرائیل کی حالیہ وحشیانہ بمباری کی شدید الفاظ میں مذمت کرتے ہیں، جس میں 28 معصوم فلسطینی مارے گئے۔ اسرائیلی فضائیہ نے رات بھر بمباری کرکے درجنوں گھر تباہ کر دیئے۔ البریج پناہ گزین کیمپ بھی اسرائیلی ظلم سے محفوظ نہ رہ سکا۔
علامہ مقصود علی ڈومکی نے کہا کہ دنیا بھر میں جاری دہشت گردی کے پیچھے اسرائیل کا ہاتھ ہے، انتہا پسند گروہ، موساد کے ایجنڈے پر چلتے ہوئے معصوم انسانوں کا خون ناحق بہانے کی بجائے غاصب صیہونی ریاست اسرائیل کے خلاف اعلان جہاد کریں۔ اسلام کا مقدس نام لے کر مسجدوں میں بم دھماکے کرنے والے آخر قبلہ اول بیت المقدس کی آزادی کی بات کیوں نہیں کرتے۔ انہوں نے کہا کہ آج عالم انسانیت کو صیہونزم سے خطرہ ہے۔ اسی لئے منصف مزاج یہودی بھی اسرائیل کی صیہونی اور ظالم حکومت کے خلاف فلسطینی عوام کی جدوجہد آزادی کی حمایت کرتے ہیں۔ انہوں نے کہا کہ تمام مکاتب فکر کے علماء، سیاسی و مذہبی رہنماء عالمی یوم القدس کے موقعہ پر مظلوم فلسطینی عوام کے حق میں صدائے احتجاج بلند کریں۔
.......
/169
