صہیونی رژیم کی غزہ میں مسلح گروہوں کی پشت پناہی جاری

اہل بیت (ع) نیوز ایجنسی ابنا کے مطابق، صہیونی رژیم بدستور غزہ میں سرگرم ایسے مسلح گروہوں کی حمایت کر رہی ہے جو حماس کے خلاف کارروائیوں میں ملوث ہیں، اور متعدد شواہد اس تعاون کے تسلسل کی نشاندہی کرتے ہیں۔

امریکی اخبار وال اسٹریٹ جرنل نے اپنی رپورٹ میں انکشاف کیا ہے کہ اسرائیل ان نیم فوجی گروہوں کی پشت پناہی کر رہا ہے جو غزہ کے ان علاقوں سے سرگرم ہیں جہاں صہیونی فوج کا کنٹرول قائم ہے، اور یہ گروہ حماس کے خلاف مسلح حملے کرتے رہے ہیں۔

رپورٹ کے مطابق، اس تعاون میں ڈرونز کے ذریعے فضائی مدد، خفیہ معلومات کی فراہمی، اسلحہ اور دیگر سامان کی ترسیل، خوراک کی فراہمی اور حتیٰ کہ زخمی افراد کو مقبوضہ علاقوں کے اسپتالوں میں منتقل کرنا بھی شامل ہے۔

اسی تناظر میں، حسام الاسطل نامی ایک مسلح گروہ کے سربراہ نے، جو غزہ میں 18 افراد پر مشتمل ہے، رواں ماہ کے آغاز میں ایک ویڈیو جاری کی، جس میں اس نے غزہ کے علاقے المواسی میں حماس کے ایک پولیس اہلکار کو قتل کرنے پر فخر کا اظہار کیا۔

تاہم، الاسطل نے ایک امریکی اخبار کو دیے گئے انٹرویو میں خوراک کے سوا کسی بھی قسم کی اسرائیلی مدد حاصل کرنے کی تردید کی اور دعویٰ کیا کہ یہ کارروائی اس کے گروہ کی ذاتی منصوبہ بندی کے تحت انجام دی گئی۔

اس کا کہنا تھا کہ مقتول پولیس افسر ان افراد کے خلاف کارروائیاں کرتا تھا جو ان کے گروہ میں شامل ہونا چاہتے تھے، انہیں گرفتار یا فائرنگ کا نشانہ بنایا جاتا تھا۔ الاسطل نے دھمکی دیتے ہوئے کہا کہ جو بھی اس کی جگہ لے گا، اسے بھی مار دیا جائے گا۔

اخبار کے مطابق، حماس کے ساتھ مشترکہ دشمنی پر مبنی یہ خفیہ تعاون اسرائیل کے لیے اس وقت مزید اہمیت اختیار کر گیا ہے جب جنگ بندی معاہدے کے تحت صہیونی فوج کی غزہ میں نقل و حرکت محدود ہو چکی ہے۔ رپورٹ میں کہا گیا ہے کہ یہ مسلح گروہ ایسے علاقوں تک رسائی رکھتے ہیں جو باضابطہ طور پر اسرائیلی فوج کے لیے ممنوع قرار دیے گئے ہیں، جن میں المواسی جیسے علاقے بھی شامل ہیں، جہاں حالیہ دنوں میں ایک پولیس اہلکار کو نشانہ بنایا گیا۔