اہل بیت(ع) نیوز ایجنسی ـ ابنا ـ کے مطابق، اسلامی
اتحاد کے مظاہرے کی غرض سے منعقد کئے جانے والے اس عوامی اجتماع سے خطاب کرتے ہوئے
مقررین نے مظلوم فلسطینی قوم کے ساتھ اظہار یکجہتی اعلان کیا اور دنیا بھر کے
مسلمانوں سے سیرت النبی (صلی اللہ علیہ و آلہ) کی پیروی کرتے ہوئے دشمنوں کے
مقابلے میں متحد ہونے کی اپیل کی۔
اس رپورٹ کے مطابق، پیغمبر اکرم (صلی اللہ علیہ و آلہ) اور آپ کے فرزند ارجمند حضرت امام جعفر صادق (علیہ السلام) کے یوم ولادت کے موقع پر لاہور کے جامعہ عروۃ الوثقیٰ میں منعقدہ شیعہ اور سنی رہنماؤں اور عوام کے عظیم الشان اجتماع میں لبیک یا غزہ اور لبیک یا اقصیٰ کے نعروں کی گونج سنائی دے رہی تھی۔
پاکستان میں مقیم اسلامی جمہوریہ ایران کے سفیر رضا امیر مقدم اس تقریب کے مہمان خصوصی تھے، جبکہ لاہور میں اسلامی جمہوریہ ایران کے قونصل جنرل اور خانہ فرہنگ کے ڈائریکٹر بھی اس موقع پر موجود تھے۔
اسلامی جمہوریہ ایران کے سفیر رضا امیر مقدم نے اپنے خطاب میں حضرت خاتم الانبیاء (صلی اللہ علیہ و آلہ) کی ولادت با سعادت کی تقریبات میں مختلف مکاتب فکر کے رہنماؤں کی شرکت کو سراہتے ہوئے کہا کہ پیغمبر اکرم (صلی اللہ علیہ و آلہ) تمام جہانوں کے لئے نعمت اور انسانیت کے لئے رحمت ہیں اور دلوں کو جلا بخشنے والے ہیں۔
انہوں نے زور دے کر کہا کہ آج کی دنیا پیغمبر اکرم (صلی اللہ علیہ و آلہ) کی اخلاقی، ثقافتی، سماجی اور سیاسی زندگی کی پیاسی ہے، لہٰذا آپؐ کی سیرت پر عمل کرکے انسانی سماج کے بہت سے مسائل حل ہوسکتے ہیں۔
ایران کے سفیر نے اسلام دشمن قوتوں کی طرف سے مسلمانوں کے درمیان تفرقہ پیدا کرنے کی کوششوں کی طرف اشارہ کرتے ہوئے کہا کہ ہم سب صہیونی ریاست کی تشکیل کے عمل اور اس کے اہداف و مقاصد سے واقف ہیں اور اہم نکتہ یہ ہے کہ اسلامی ممالک اور امت اسلامیہ کو اس سے غفلت نہیں برتنا چاہئے کیونکہ پچھلے 76 برس کا تجربہ یہ ہے کہ صہیونی ریاست کسی بھی معاہدے اور وعدے کی پابند نہیں ہے۔
انہوں نے کہا کہ دنیا کو جان لینا چاہئے کہ اسرائیلی وزیر اعظم بنیامین نیتن یاہو اور ناجائز صہیونی ریاست ایک غیر معمولی صورتحال میں پھنس چکی ہے اور اس دلدل سے بچنے کا واحد طریقہ ان کے پاس یہ ہے کہ ایک مکمل علاقائی جنگ شروع کی جائے جس میں امریکہ بھی شامل ہوجا!
تقریب سے خطاب کرتے ہوئے جامع عروۃ الوثقیٰ کے سربراہ علامہ سید جواد نقوی نے اسلامی مزاحمت کے شہداء بالخصوص بیت المقدس کے بہادر جوانوں کو خراج عقیدت پیش کرتے ہوئے کہا کہ آج پوری دنیا کے مسلمان امام خمینی (رضوان اللہ علیہ) کی گرانقدر خدمات اور دور اندیشی کے مرہون منت ہیں کیونکہ انہوں نے ہفتہ وحدت کا اعلان کیا اور تمام مسلمانوں کو اسلامی اتحاد کی دعوت دی۔
تقریب سے خطاب کرتے ہوئے دیگر مقررین نے بھی شیعہ اور سنی یکجہتی کو اجاگر کرنے کی غرض سے ہفتہ وحدت کی اہمیت پر زور دیا۔
مقررین نے غزہ میں مستقل جنگ بندی، محاصرہ ختم کرنے اور غزہ تک امداد پہنچانے کے لئے انسانی راہداری کھولنے کا مطالبہ کیا۔
تقریب میں شریک پاکستانی رہنماؤں نے غزہ کے مظلوموں کے خلاف غاصب اسرائیلی ریاست کے جرائم اور امریکہ اور اس کے اتحادیوں کی جانب سے اسرائیل کی حمایت کی مذمت کی۔
مقررین نے اسلامی ممالک سے فلسطینی مزاحمتی محاذ کی حمایت اور غزہ کے نہتے عوام کے تحفظ کے لئے موثر اقدامات کا بھی مطالبہ کیا۔
۔۔۔۔۔۔۔۔۔
110
