روس: شامی حکومت پر کیمیائی حملے کا الزام بے بنیاد ہے

ابنا: جاری کيے گئے بیان میں روسی وزارت خارجہ کے ترجمان الیکزنڈر لوکاشیوچ نے یہ بات کہی۔ اس سے ایک دن پہلے ہی اقوام متحدہ کے معائنہ کاروں نے اپنی رپورٹ میں دمشق کے مضافات میں ایک کیمیائی حملے میں سارین گیس کے استعمال کی تصدیق کی تھی، تاہم اس رپورٹ میں حملہ آوروں کی جانب کوئی اشارہ نہیں کیا گيا۔لوکاشیوچ نے کہا کہ مغرب کی جانب سے اسد حکومت کو اس حملے کے مورد الزام ٹہرانا بے بنیاد اور سادگی بھرا ہے۔اس سے ایک روز قبل، روس کے وزیر خارجہ سرگئی لاروف نے کہا تھا کہ 21 اگست کو دمشق کے مضافات میں ہونے والے کیمیائی حملے میں شامی فوج کے ملوث ہونے کا کوئی ثبوت نہیں ہے بلکہ روس کو یقین ہے کہ یہ حملہ بیرونی حمایت یافتہ دہشت گرد گروہوں نے کیا ہے۔لاروف نے فرانسیسی وزیر خارجہ لارینٹ فیبئس کے ساتھ ماسکو میں ایک مشترکہ پریس کانفرنس میں یہ بیان دیا۔روسی وزیر خارجہ کا کہنا تھا کہ اقوام متحدہ کی رپورٹ ماسکو کی جانب سے پوچھے گئے کچھ اہم سوالوں کے جواب دینے میں ناکام رہی ہے جیسے کہ یہ ہتھیار کہاں بنائے گئے تھے؟ گھر میں یا کسی کارخانے میں۔انہوں نے کہا کہ اس یقین کے لیے ہمارے پاس معقول وجہ ہے کہ یہ ایک اشتعال انگیز قدم تھا۔......./169