افغانستان

قرآن مجید کی بے حرمتی کے بعد امریکی مفادات پر حملوں کا آغاز

24 فروری 2012 - 20:30

News ID: 298740

افغانستان میں امریکی فوجیوں کے ہاتھوں قرآن مجید کی بے حرمتی کے واقعہ کے خلاف ہونے والے تازہ پر تشدد احتجاج میں مزید چھ افراد جاں بحق اور درجنوں زخمی ہو گئے ہیں جبکہ مظاہرین نے قندوز میں اقوامِ متحدہ کے ایک دفتر کو بھی آگ لگا دی ہے اور دنیا بھر میں امریکی مفادات پر حملے کرنے کا بھی اعلان کیا ہے۔

ابنا: اطلاعات کے مطابق افغانستان کے دارالحکومت کابل میں وزارتِ داخلہ کے اندر فائرنگ کے ایک واقعہ میں دو غیر ملکی فوجی ہلاک ہو گئے ہیں۔

ذرائع کے مطابق انتہائی سکیورٹی والے علاقے میں پیش آنے والے اس واقع کے بعد وزارتِ داخلہ کو بند کر دیا گیا ہے۔بین الاقوامی سکیورٹی فورسز ایساف نے ہلاکتوں کی تصدیق کی ہے لیکن ہلاک ہونے والوں کی شہریت نہیں بتائی۔

تاہم افغان سکیورٹی فورسز کا کہنا ہے کہ ہلاک ہونے والوں میں ایک امریکی فوج کا کرنل اور دوسرا میجر تھا۔ادھر چار افراد قندوز صوبے میں ہلاک ہوئے جو پولیس اہلکاروں نے اقوامِ متحدہ کے دفتر کے قریب مظاہرہ کرنے والے افراد پر گولی چلا دی۔

تین افراد جنوبی صوبے لوغر میں ہلاک ہوئے۔کابل کے قریب بگرام کے فوجی اڈے میں تعینات نیٹو فوجیوں کے ہاتھوں قرآن جلائے جانے پر منگل کے روز سے جاری احتجاج میں اب تک 27 افراد جاں بحق ہو چکے ہیں۔ مظاہرین نے مسلمانوں سے اپیل کی ہے کہ وہ دنیا بھر میں امریکی مفادات پر حملے کریں ۔ اور افغانستان اور خطے سے امریکی انخلا کے ۂغے متحدہ ہوجائیں۔