اہل بیت(ع) نیوز ایجنسی ۔ ابنا ۔ کی رپورٹ کے مطابق وزارت خارجہ کے ترجمان بہرام قاسمی نے جمعے کے روز اپنے ایک بیان میں خاندان رسالت کی برگزیدہ ہستی سید محمد بن علی کے روضے پر حملے کی مذمت اور درجنوں زائرین کی شہادت پر افسوس کا اظہار کیا ہے۔ بہرام قاسمی نے شہید ہونے والوں کے لواحقین سے ہمدردی کا اظہار کرتے ہوئے کہا کہ مذہبی اور دینی پیشواؤں کے مزارات پر حملہ انتہائی شرمناک اور گھناؤنا فعل ہے۔
ایران کی وزارت خارجہ کے ترجمان نے ایک بار پھر تکفیری دہشت گردی اور اس گروہ کے جنون آمیز رویئے کے ٹھوس اور موثر مقابلے کے لیے عالمی اتحاد کی ضرورت پر زور دیا۔
قابل ذکر ہے کہ عید الفطر کے دن ایک خودکش حملہ آور نے عراق کے صوبے صلاح الدین کے شہر بلد میں واقع امام علی نقی علیہ السلام کے فرزند حضرت محمد بن علی کے مزار کے دروازے پر خود کو دھماکے سے اڑا لیا جس میں کم سے اسی افراد شہید اور پچاس افراد زخمی ہوگئے۔ دہشت گرد گروہ داعش نے اس حملے کی ذمہ داری قبول کر لی ہے۔
۔۔۔۔۔
/169
