ایران، روس اور چین کا سہ فریقی مشترکہ اجلاس، منگل کو ماسکو میں ہوگا

اہل بیت(ع) نیوز ایجنسی ـ ابنا ـ کے مطابق، روسی وفاق میں اسلامی جمہوریہ ایران کے سفیر کاظم جلالی نے بتایا کہ ایران، روس اور چین کے سہ فریقی مذاکرات ماہرین کی سطح پر منعقد ہوں گے اور اس دوران ایران کے ایٹمی پروگرام اور تہران پر عائد پابندیوں پر غور کیا جائے گا۔
روس کی وزارت خارجہ کی ترجمان نے بھی اس خبر کی تصدیق کی ہے۔
روس میں ایران کے سفیر نے بتایا کہ اس سے قبل ایران اور یورپی ٹرائیکا کے درمیان بھی اسی سطح پر گفتگو انجام پا چکی ہے۔
کاظم جلالی کے مطابق، دوطرفہ اور بین الاقوامی معاملات من جملہ ایٹمی موضوع کے بارے میں تہران، ماسکو اور بیجنگ کے درمیان مذاکرات کا سلسلہ برقرار ہے۔
اس سے قبل ایران کی وزارت خارجہ کے ترجمان اسماعیل بقائی نے بھی بتایا تھا کہ بہت جلد ایران کے نائب وزرائے خارجہ اور یورپی یونین کی خارجہ پالیسی کے نئے عہدے داروں کے درمیان ملاقات اور گفتگو ہوگی۔
واضح رہے کہ 14 مارچ سنہ 2025ع‍ کو چین کی میزبانی میں ایران، چین اور روس کے نائب وزرائے خارجہ کے مذاکرات ہوئے تھے جن میں تین ملکوں نے اس بات پر اتفاق کیا کہ ایران کو پرامن ایٹمی پروگرام رکھنے کا مکمل حق حاصل ہے۔
۔۔۔۔۔۔۔۔۔۔۔۔۔۔۔
110