اہل بیت(ع) نیوز ایجنسی۔ابنا۔ امامیہ اسٹوڈنٹس آرگنائزیشن پاکستان ملتان ڈویژن کے زیر اہتمام فلسطینی مسلمانوں سے اظہار یکجہتی اور اسرائیلی مظالم کے خلاف مقامی ہوٹل میں یکجہتی فلسطین کانفرنس منعقد ہوئی، کانفرنس میں مختلف سیاسی، سماجی، مذہبی اور سول سوسائٹی کی شخصیات نے شرکت کی۔ کانفرنس سے خطاب کرتے ہوئے آئی ایس او پاکستان کے مرکزی صدر کا کہنا تھا کہ مسجد اقصیٰ تمام عالم اسلام کے لئے احترام و عقیدت کا مرکز ہے اور اس پر یہودیوں کا ناجائز قبضہ تمام عالم اسلام کے لئے باعث ننگ و عار ہے، مسجد اقصیٰ کی آزادی کے لیے تمام سیاسی و مذہبی جماعتوں کو مل کر حکومت وقت سے عالمی یوم القدس کو قومی سطح پر منانے کے لئے مطالبہ کرنا چاہیئے، پاکستانی حکومت کو بیانات اور مذمت کی سیاست سے باہر نکل کر مسجد اقصیٰ کی آزادی کے لئے عملی اقدامات کرنے کی ضرورت ہے۔
کانفرنس سے مجلس وحدت مسلمین جنوبی پنجاب کے رہنما و ممبر متحدہ علماء بورڈ علامہ قاضی نادر حسین علوی، ہائیکورٹ بار کے سابق نائب صدر یافث نوید ہاشمی، پاکستان عوامی تحریک کے ترجمان راو محمد عارف رضوی، شیعہ علماء کونسل کے مرکزی رہنماء سید مصور نقوی، آئی ایس او پاکستان کے مرکزی جنرل سیکرٹری شہریار حیدر، انچارج خانہ فرہنگ اسلامی جمہوریہ ایران ملتان خانم زاہدہ بخاری، امامیہ آرگنائزیشن پاکستان کے سابق چیئرمین سجاد نقوی، پاکستان پیپلزپارٹی کے سابق ایم پی اے بابو نفیس انصاری، ایم ڈبلیو ایم ملتان کے سیکرٹری جنرل مولانا وسیم عباس معصومی، سنی اتحاد کونسل کے صوبائی رہنماء قاری محمد افضل، پریس کلب ملتان کے سابق جنرل سیکرٹری مظہر جاوید سیال، فلسطین فائونڈیشن جنوبی پنجاب کے ترجمان ثقلین نقوی، عوامی ورکر پارٹی کے رہنماء فرحت عباس، سائوتھ پنجاب ورکر فیڈریشن کے رہنماء دلاور عباس صدیقی، اسلامی جمعیت طلبہ کے رہنماء حسنین احمد، جمعیت علمائے اسلام جنوبی پنجاب کے ڈپٹی سیکرٹری جنرل قاری ایاز الحق قاسمی، مولانا اسرارالحق مجاہد اور دیگر نے خطاب کیا، کانفرنس آخر میں مشترکہ اعلامیہ جاری کیا گیا اور دعائے وحدت سے کانفرس کا اختتام کیا گیا۔
۔۔۔۔۔۔۔۔۔۔۔۔۔
242
