اہل بیت(ع) نیوز ایجنسی ۔ ابنا ۔ کی رپورٹ کے مطابق آل پارٹیز کرم ایجنسی کی جانب سے پریس کلب پاراچنار میں مشترکہ پریس کانفرنس کا انعقاد کیا گیا۔ جس میں تمام پارٹیوں بشمول قومی وطن پارٹی نے بھرپور شرکت کی۔ تمام پارٹیوں نے پاراچنار کے حالیہ بم دھماکے کی شدید الفاظ میں مذمت کی اور حکومت وقت سے مطالبہ کیا کہ واقعے کی آزادانہ تحقیقات کرکے عوام کے سامنے پیش کریں۔ پریس کانفرنس میں مقررین نے مطالبات پیش کرتے ہوئے کہا کہ شہداء و زخمیوں اور تباہ شدہ املاک کے پیکیج میں اضافہ کیا جائے۔ ملک کے دوسرے صوبوں کی طرح اس دھماکے میں ہونے والے متاثرین کو بھی انصاف دیا جائے۔ انہوں نے مزید کہا کہ مظاہرین پر فائرنگ میں ملوث اہلکاروں کے خلاف ریاستی قوانین کے مطابق کارروائی کی جائے۔ کرم ایجنسی میں دہشت گرد اور انکے سہولت کاروں کے خلاف کارروائی کی جائے اور دھماکے میں ملوث افراد کے خلاف آپریشن ردالفساد کے تحت کارروائی عمل میں لائی جائے۔ انہوں نے کہا کہ کرم ایجنسی میں انٹری چیک پوسٹوں پر حفاظتی اقدامات کئے جانے اور رجسٹریشن کے ایسے قوانین متعارف کئے جائیں، جس سے عوام کو سہولت ہو۔
/169
