سلامتی کونسل کی بے عملی صہیونی جرائم کے تسلسل کا سبب ہے، عراقچی

اہل بیت(ع) نیوز ایجنسی ـ ابنا ـ کے مطابق، وزیر خارجہ اسلامی جمہوریہ ایران سید عباس عراقچی نے ایکس  پر لکھا: میں نے اقوام متحدہ کے سیکریٹری جنرل کے ساتھ بات چیت میں اس بات پر زور دیا کہ امریکہ، نیز اسرائيل کے دیگر مغربی حامیوں  کی پیدا کردہ رکاوٹوں کی وجہ سے اقوام متحدہ کی سلامتی کونسل بے عملی اور انفعالیت سے دوچار ہوئی اور اس کی انفعالیت ناجائز صہیونی ریاست کی مہم جوئیوں اور جرائم کے تسلسل کا باعت ہے۔

انہوں نے مزید لکھا:  ان حالات میں  سیکریٹری جنرل کی قانونی اور اخلاقی ذمہ داری کا تقاضا ہے کہ  وہ جارحیت اور نسل کُشی کے خلاف عالمی برادری کی آواز  بنیں  اور اقوام متحدہ کے چارٹر کے مطابق اپنے اختیارات کا استعمال کرتے ہوئے عالمی برادری کو صہیونی ریاست کی جارحیت کے خلاف موثر کارروائی کرنے کے لیے متحرک کریں۔

سید عباس عراقچی نے مزید لکھا: میں نے سیکریٹری جنرل کو یاددہانی کرا دی کہ امریکہ غزہ اور لبنان میں اسرائیل کے جرائم میں قطعی  طور پر شریک  ہے، جیسا کہ سید مزاحمت کو بھی امریکہ کی طرف سے  دیئے گئے  5000 پاؤنڈ کے بنکر شکن ہتھیاروں سے شہید کیا گيا۔

وزیر خارجہ نے مزید کہا: اسلامی جمہوریہ ایران اپنی سلامتی اور تزویراتی مفادات کے دفاع و تحفظ اور صہیونی ریاست کی خباثت کا مقابلہ کرنے کے لیے پرعزم ہے۔ ایران لبنان کے ساتھ کھڑا  ہے۔

۔۔۔۔۔۔۔۔

110