عالمی برادری فلسطینی قوم کو نسل کشی سے بچائے، حماس

اہل بیت(ع) نیوز ایجنسی ـ ابنا ـ کے مطابق فلسطین کی حرکۃ المقاومۃ الاسلامیہ "حماس" نے  اپنے بیان میں کہا ہے کہ صہیونی دشمن نے شمالی غزہ کے جبالیا کیمپ  اور بیت لاہیا میں اپنے وحشیانہ حملوں کا سلسلہ جاری رکھا ہؤا ہے۔

حماس نے صہیونیوں کے ہاتھوں جبالیا اور بیت لاہیا کے مسلسل محاصرے کی طرف اشارہ کرتے ہوئے کہا ہے کہ صہیونی دشمن نے بیت لاہیا میں وحشیانہ بمباری شدید تر کردی ہے اور 55 دنوں سے اس شہر کا محاصرہ جاری رکھا ہؤا ہے۔

حماس نے کہا ہے کہ امریکی حکومت صہیونی دشمن کی اصل حامی اور فلسطینی عوام کی نسل کشی سمیت صہیونی ریاست کے تمام بہیمانہ جرائم میں برابر کی شریک ہے۔

حماس نے اپنے بیان میں بین الاقوامی برادری اور دنیا کے حریت پسندوں سے مطالبہ کیا ہے کہ غزہ میں فلسطینی عوام کو نسل کشی اور بھوک مری سے بچانے کے لئے بلا تاخیر ضروری اقدامات اٹھائے جائیں۔

حماس نے بین الاقوامی امدادی اداروں اور انسانی ہمدردی پر مبنی معاملات میں سرگرم تنظیموں سے بھی اپیل کی ہے کہ غزہ کے عوام تک امداد رسانی کے لئے اپنی کوششیں جاری رکھیں اور امداد کا راستہ کھولنے کے لئے صہیونی ریاست پر دباؤ بڑھا دیں۔

۔۔۔۔۔۔۔

110