امت مسلمہ اپنے درمیان وحدت قائم کرے،اسرائیل کو منہ توڑ جواب دیا جائے

ابنا: مانیٹرنگ ڈیسک کی رپورٹ کے مطابق شام پر حالیہا سرائیلی جارحیت کے خلاف عراق کے معروف عالم دین اور امریکہ مخالف مجاہد رہنما سید مقتدیٰ صدر نے امت مسلمہ کے نام جاری ایک کھلے خط میں کہا ہے کہ امت مسلمہ ایک نازک اور حساس دور سے گزر رہی ہے اور امت مسلمہ سے میرا یہ تقاضہ ہے کہ امت اپنی صفوں میں اختلافات کو ختم کرے اور اتحاد ووحدت کی فضاء کو فروغ دے۔امریکہ مخالف بہادر مجاہد سید مقتدیٰ صدر نے کہا ہے کہ امت مسلمہ غاصب صہیونی اسرائیل کے خلاف اٹھ کھڑی ہو ،انہوں نے کہا کہ فلسطین کی حمایت کرنے اور جہاد و مقاومت کی حمایت کے جرم میں برادر ملک شام پر صہیونی سازشیں حملہ آور ہیں اور دنیا فقط تماشا دیکھ رہی ہے۔انہوں نے کہا ہے کہ ایسے حالات میں ضروری ہے کہ امت مسلمہ متحد ہو کر صہیونیوں کے خلاف مشترکہ حکمت عملی بنائے اور صہیونیوں کو منہ توڑ جواب دیا جائے۔انہوں نے کہا کہ ہم تمام مسلمانوں،عربوں،اقوام متحدہ اور اسلامی حکومتوں کو دعوت دیتے ہیں کہ وہ بیرونی مداخلتوں کے خلاف اٹھ کھڑے ہوں تا کہ ظالموں کا احتساب کیا جائے۔......./169