اہل بیت نیوز ایجنسی ابنا کی رپورٹ کے مطابق،عبدالواحد ابوراس نے سید حسن نصراللہ اور سید ہاشم صفی الدین کی شہادت کی دوسری برسی کے موقع پر حزب اللہ کے عرب و بین الاقوامی تعلقات کے ذمہ دار سید عمار الموسوی کے نام اپنے پیغام میں کہا کہ ان شہید رہنماؤں نے اپنی زندگیاں خدا کی راہ میں جہاد، صہیونی حکومت کی جارحیت کا مقابلہ کرنے اور امت مسلمہ، بالخصوص فلسطین کے جائز حقوق کے دفاع کے لیے وقف کر دی تھیں۔
انہوں نے کہا کہ امت مسلمہ نے سید حسن نصراللہ کی شہادت کے ساتھ ایک عظیم رہنما کو کھو دیا، جن کی یاد نسلوں کے دلوں میں ہمیشہ زندہ رہے گی۔
یمنی عہدیدار نے تاکید کی کہ صہیونی حکومت کی جانب سے اختیار کی گئی بزدلانہ ٹارگٹ کلنگ کی پالیسی صرف مزاحمت کو مزید مضبوط، ثابت قدم اور اپنے جائز حقوق کے حصول کے لیے پُرعزم بنائے گی۔
انہوں نے کہا کہ یمنی عوام شہید سید حسن نصراللہ، جنہیں انہوں نے اسلام اور انسانیت کا شہید قرار دیا، کی یمن کے لیے حمایت کو کبھی فراموش نہیں کریں گے اور ان کے یہ مؤقف یمنی عوام کے دلوں میں ہمیشہ محفوظ رہیں گے۔
عبدالواحد ابوراس نے مزید کہا کہ حزب اللہ نے بے شمار قربانیوں کے باوجود اپنی استقامتی راہ کو جاری رکھا ہوا ہے اور وعدہ شدہ فتح تک اس سفر کو جاری رکھنے کی صلاحیت رکھتی ہے۔
ان کے مطابق شہداء کا پاکیزہ خون آج مزاحمت کے مختلف محاذوں پر حاصل ہونے والی کامیابیوں کی صورت میں ثمر آور ہو رہا ہے۔ انہوں نے کہا کہ ہمارے عوام آج استکبار کے خلاف جاری جدوجہد میں شہید سید حسن نصراللہ اور ان کے ساتھیوں کی عظیم میراث سے استقامت، مزاحمت اور کامیابی کے لیے حوصلہ حاصل کر رہے ہیں۔
یمنی نائب وزیر خارجہ نے کہا کہ ہم شہید سید حسن نصراللہ سے ایک بار پھر عہد کرتے ہیں اور حزب اللہ کے سیکرٹری جنرل شیخ نعیم قاسم اور لبنان کی مزاحمت کے دیگر رہنماؤں کو یقین دلاتے ہیں کہ اللہ کی مدد اور آپ کی قربانیوں سے یہ وعدہ پورا ہوتا دکھائی دے رہا ہے کہ شکستوں کا دور ختم اور فتوحات کا دور شروع ہو چکا ہے۔
عبدالواحد ابوراس نے اپنے پیغام کے اختتام پر لبنان کے عوام اور صہیونی حکومت کی مسلسل جارحیت کے خلاف مزاحمت کی حمایت میں یمنی قیادت اور عوام کے مستقل مؤقف کا اعادہ کیا۔
آپ کا تبصرہ