اہل بیت نیوز ایجنسی ابنا کی رپورٹ کے مطابق، امریکی صدر ٹرمپ نے ایران کو خبردار کیا ہے کہ اگر 48 گھنٹوں کے اندر آبنائے ہرمز میں بحری آمد و رفت مکمل طور پر بحال نہ کی گئی تو امریکہ ایران کے بجلی گھروں کو نشانہ بنا سکتا ہے۔
ٹرمپ نے اپنے سوشل میڈیا پلیٹ فارم پر جاری بیان میں کہا کہ امریکہ ایران کے توانائی کے بنیادی ڈھانچے پر حملہ کر سکتا ہے، اور اس کا آغاز بڑے پاور پلانٹس سے کیا جائے گا۔
اس بیان کے فوری بعد ایران کی جانب سے سخت ردعمل سامنے آیا۔ ایرانی فوج کے مرکزی ہیڈکوارٹر خاتم الانبیاء کے ترجمان نے خبردار کیا کہ اگر ایران کے توانائی یا ایندھن کے ڈھانچے کو نشانہ بنایا گیا تو خطے میں موجود امریکی اور اسرائیلی تنصیبات کو بھی نشانہ بنایا جائے گا۔
ایرانی حکام نے مزید کہا کہ اس طرح کی کسی بھی کارروائی کا جواب "فیصلہ کن اور ہمہ جہت" ہوگا، جس میں توانائی، ٹیکنالوجی اور دیگر اہم تنصیبات شامل ہو سکتی ہیں۔
یاد رہے کہ آبناے ہرمز عالمی سطح پر تیل کی ترسیل کا ایک اہم راستہ ہے، جہاں سے دنیا کی تقریباً 20 فیصد تیل کی سپلائی گزرتی ہے۔ اس علاقے میں کشیدگی بڑھنے سے عالمی توانائی منڈیوں پر بھی اثرات مرتب ہو سکتے ہیں۔
تجزیہ کاروں کے مطابق حالیہ بیانات سے ظاہر ہوتا ہے کہ خطے میں کشیدگی مزید بڑھ سکتی ہے، جبکہ عالمی برادری کی جانب سے تحمل اور سفارتی حل پر زور دیا جا رہا ہے۔
آپ کا تبصرہ