پاکستان: یحییٰ سنوارکی شہادت اسرائیل اور اس کے حامیوں کی حتمی شکست رقم کرے گی، پاکستانی عمائدین کے پیغامات

اہل بیت(ع) نیوز ایجنسی ـ ابنا ـ کے مطابق، امیر جماعت اسلامی پاکستان حافظ نعیم الرحمان نے یحییٰ سنوار کی شہادت پر ایک پیغام جاری کرکے کہا  ہے کہ باطل کے خلاف حق کی جنگ کے میدان میں ایک اور روح سربلندی کے ساتھ اپنے پروردگارکی طرف پلٹ گئی۔

انھوں نے کہا ہے کہ شہید احمد یاسین اور شہید اسماعیل ہنیہ کے بعد  حماس کے ایک اور رہنما یحییٰ سنوار  صہیونی ریاست کے ہاتھوں  ایسی حالت میں شہید ہوئے ہیں کہ آخری سانس تک شجاعت کے ساتھ غاصبوں کے خلاف لڑٹے رہے۔

امیر جماعت اسلامی پاکستان نے کہا ہے کہ اسرائیلی حکومت اور اس کے حامی جان لیں کہ سنوار کی شہادت اور مجاہدین بیت المقدس کی جانفشانیاں غزہ کے عوام کو کامیابی سے قریب تر کررہی ہیں۔

لاہور کے جامعۃ العروۃ الوثقی کے سربراہ علامہ سید جواد نقوی نے  یحییٰ سنوارکی شہادت پر پیغام تعزیت میں کہا ہے کہ ان عزیز ہستیوں کی فداکاری اسرائیل اور اس کے حامیوں کی حتمی شکست کے اسباب فراہم کرے گی۔ 

پاکستان کی مجلس علمائے مکتب اہل بیت(ع) نے بھی ایک بیان جاری کرکے یحییٰ سنوار کو شہید کرنے کے غاصب صہیونی ریاست کے اقدام کی مذمت کی ہے اور فلسطینی عوام نیز محور مقاومت اوراس کے حامیوں کے ساتھ یکجہتی کا اعلان کیا ہے۔

مجلس علمائے مکتب اہل بیت(ع) کے بیان میں کہا گیا ہے کہ  پاکستان کے عوام  اور فلسطینیوں کے حقوق کے دفاع میں مصروف محور مقاومت کے حامی،  غاصب صہیونی ریاست کے جرائم  سے پردہ ہٹانے کی اپنی مہم جاری رکھیں گے۔

پاکستان کے ممتاز سیاستداں اور سینیٹ کی دفاعی کمیٹی کے سابق چیئرمین مشاہد حسین سید نے بھی یحییٰ سنوار کی شہادت پر ایک پیغام جاری کرکے کہا ہے کہ  سنوار ایک عظیم اور شجاع مجاہد تھے جنہوں نے  صہیونیوں کے قبضے سے اپنے وطن کی آزادی کے لئے 23 برس جیل میں قید و بند کی صعوبتیں جھیل لیں اور اس راہ میں شہید ہوگئے ۔

مشاہد حسین سید نے کہا کہ شہید سنوار کا خون اور جانفشانی ہرگز رائیگاں نہيں جائے گی۔

۔۔۔۔۔۔۔

110