اہل بیت(ع) نیوز ایجنسی۔ابنا۔ اسلام آباد میں ترجمان دفتر خارجہ نے میڈیا بریفنگ کے دوران بتایا کہ نریندر مودی کا مقبوضہ جموں و کشمیر کا دورہ ایک دھوکا ہے، رتلے منصوبہ کا سنگ بنیاد رکھنے کی شدید مذمت کرتے ہیں، منصوبہ عالمی قوانین اور سندھ طاس معاہدے کی خلاف ورزی ہے، بھارت منصوبے کی تعمیر سے باز رہے۔ انہوں نے کہا کہ بھارت میں ہندوتوا نظریات فروغ پارہے ہیں، اقلیتوں کے خلاف ناروا رویہ روا رکھا جارہا ہے۔
ان کا کہنا تھا کہ وزیراعظم شہباز شریف نے حلف اٹھانے کے بعد خارجہ پالیسی کی خدوخال پر روشنی ڈالی، نئے وزیر اعظم نے اسلامی ممالک اور بھارت کے ساتھ اچھے تعلقات کی خواہش کا اظہار کیا۔ انہوں نے کہا کہ وزیر اعظم کو منتخب ہونے پر متعدد ممالک کے وزرائے خارجہ نے مبارکباد دی، وزیر اعظم اعلیٰ سطح کے وفد کے ہمراہ رواں ہفتے سعودی عرب جائیں گے، دورے کی مزید تفصیلات جلد جاری کردی جائیں گی۔ ترجمان دفتر خارجہ نے مزید بتایا کہ امریکی کانگریس کی رکن الہان عمر نے پاکستان کا اہم دورہ کیا، اپنے دورے کے دوران انہوں نے صدر مملکت، وزیراعظم اور دیگر اہم شخصیات سے ملاقاتیں کیں، الہان عمر نے لائن آف کنٹرول کا دورہ بھی کیا۔
عاصم افتخار نے کہا کہ حنا ربانی کھر نے وزیر مملکت برائے خارجہ کا چارج سنبھال لیا ہے، وزیر مملکت کو متحدہ عرب امارات کے وزیر خارجہ سمیت دیگر ممالک کے وزرائے خارجہ نے مبارکباد کے لیے فون کیے۔ ان کا کہنا تھا کہ پاکستان، افغانستان میں دہشت گردی کی نئی لہر پر تشویش کا اظہار کرتا ہے، قیمتی جانوں کے ضیاع پر دکھ اور افسوس ہے، پاکستان مشکل کی اس گھڑی میں اپنے افغان بھائیوں کے ساتھ کھڑا ہے۔ انہوں نے کہا کہ فلسطین میں ماہ صیام میں اسرائیلی مظالم کی شدید مذمت کرتے ہیں، عالمی برادری اسرائیلی مظالم کا نوٹس لے، او آئی سی کا وزرائے خارجہ کا غیر معمولی اجلاس جدہ میں جاری ہے۔
۔۔۔۔۔۔۔۔۔۔۔۔۔۔
242
