اہل بیت(ع) نیوز ایجنسی۔ابنا۔ پاکستان کی فوج نے ادارے کے خلاف سوشل میڈیا پر چلنے والی حالیہ پروپیگنڈا مہم پر نوٹس لیتے ہوئے اس کو ادارے اور سوسائٹی کے درمیان تقسیم قرار دیا اور قیادت کی جانب سے ‘آئین اور قانون کی بالادستی قائم رکھنے کے عزم’ پر مکمل اعتماد کا اظہار کیا۔
پاکستان کی فوج کے شعبہ تعلقات عامہ کی جانب سے جاری بیان کے مطابق جنرل ہیڈکوارٹرز میں چیف آف آرمی اسٹاف جنرل قمر جاوید باجوہ کی زیرصدارت 79ویں فارمیشن کمانڈرز کانفرنس منعقد ہوئی جہاں کورکمانڈرز، پرنسپل اسٹاف افسران اور تمام فارمیشن کمانڈرز نے شرکت کی۔
بیان میں کہا گیا کہ کانفرنس میں چند حلقوں کی جانب سے پاکستانی فوج کو بدنام کرنے کے لیے کی گئی حالیہ پروپیگنڈا مہم اور ادارے اور سوسائٹی کے درمیان تقسیم پیدا کرنے کی کوشش پر نوٹس لیا گیا۔
آئی ایس پی آر نے بتایا کہ پاکستان کی قومی سلامتی مقدم ہے، پاکستانی فوج ہمیشہ ریاستی اداروں کی حفاظت کے لیے ان کے ساتھ کھڑی رہی ہے اور کسی شرط کے بغیر ہمیشہ رہے گی۔
بیان میں کہا گیا کہ کانفرنس کے شرکا نے قیادت کے ہرقیمت میں آئین اور قانون کی بالادستی برقرار رکھنے کے لیے مؤقف پر مکمل اعتماد کا اظہار کیا گیا۔
خیال رہے کہ رواں ہفتے سابق وزیراعظم عمران خان کو تحریک عدم اعتماد کے ذریعے عہدے سے ہٹائے جانے کے بعد پاکستان کی فوج پر تنقید کی گئی تھی اور ٹوئٹر پر فوج اور فوجی قیادت کے خلاف سرگرمیاں دیکھی گئی تھیں اور ٹرینڈز چلائے گئے تھے۔
آئی ایس پی آر نے اجلاس کے حوالے سے بتایا کہ سوشل میڈیا پر چلنے والی مہم پر نوٹس لینے کے علاوہ فوجی قیادت کو پیشہ ورانہ امور، قومی سلامتی کو درپیش چیلنجز اور روایتی اور غیرروایتی خطرات سے نمٹنے کے لیے انسدادی اقدامات پر بھی بریفنگ دی گئی۔
بیان میں بتایا گیا کہ چیف آف آرمی اسٹاف نے فارمیشنز کی پیشہ ورانہ تیاریوں اور ابھرتے ہوئے چینلجز کے توڑ کے لیے طریقہ کار پر اطمینان کا اظہار کیا۔
آئی ایس پی آر نے بتایا کہ اجلاس میں افسران او جوانوں کی جانب سے سرحدوں کی حفاظت اور عوام کی سلامتی کے لیے قیمتی قربانیوں پر زبردست خراج عقیدت پیش کیا۔
بیان میں بتایا گیا کہ پاک فوج اپنی ذمہ داریوں سے آگاہ ہے اور ہر طرح کے حالات میں تمام اندرونی اور بیرونی خطرات کے خلاف پاکستان کی سرحدی استحکام اور خودمختاری کا دفاع جاری رکھے گی۔
۔۔۔۔۔۔۔۔۔۔۔۔۔۔
242
