اہل بیت(ع) نیوز ایجنسی ـ ابنا ـ کے مطابق، صدر
اسلامی جمہوریہ ایران ڈاکٹر مسعود پزشکیان نے بدھ کی شام ملائیشیا کے وزیر خارجہ
داتو سری اوتاما حاجی بن محمد حاجی حسن کے ساتھ ملاقات میں، موجودہ عالمی حالات کے
پیش نظر، ایران اور ملائیشیا سمیت اسلامی ممالک کے درمیان ہم آہنگی کے فروغ کو اہم
ضرورت قرار دیا اور کہا کہ ہمارا مقصد باہمی روابط، ہم آہنگی اور تعاون کا فروغ
ہے۔ اگر آج صہیونی ریاست خطے میں جرائم اور جارحیت کی جرات کر رہی ہے تو اس کی وجہ
مسلمان ایک دوسرے سے لاتعلق ہیں۔
صدر پزشکیان نے عالم اسلام کے رہنماوں اور سیاست
دانوں کے درمیان ہم آہنگی اور یکجہتی کو اسلامی معاشروں سے اختلافات، غلط فہمیوں
کے ازالے اور غربت اور محرومیوں کے خاتمے کے لئے موثر قرار دیا اور کہا کہ اسلامی
جمہوریہ ایران ملائشیا سمیت اسلامی ممالک کے ساتھ تمام شعبوں میں تعلقات کو فروغ دینے
کے لئے پرعزم ہے۔
صدر نے امید ظاہر کی کہ یہ ملاقاتیں دونوں ممالک
کے درمیان مضبوط اور تعمیری تعلقات کے قیام اور دیگر اسلامی ممالک کے ساتھ اتحاد
کا باعث بنیں گی۔
ملائیشیا کے وزیر خارجہ داتو سری اوتاما حاجی نے
صدر ایران سے ملاقات پر خوشی کا اظہار کرتے ہوئے انہیں ملائیشیا کے بادشاہ اور وزیر
اعظم کی جانب سے نیک خواہشات کا پیغام پہنچایا۔
انھوں نے کہا: ایران اور ملائیشیا کے درمیان
تعلقات افہام و تفہیم اور دوستی پر مبنی ہیں۔
انھوں نے ایران کے ساتھ سائنس اور ٹیکنالوجی،
تعلیم، خوراک اور زراعت کے شعبوں میں
تعاون پر زور دیا۔
ان کا کہنا تھا کہ ایران ایک قدیم تہذیب کا حامل
تاریخی ملک اور عالمی سطح پر ممتاز سائنسدانوں، محققین اور فلاسفرز کی سرزمین ہے
اور ملائیشیا دونوں ممالک کے مشترکہ مفادات کے مطابق ان سائنسی صلاحیتوں کو مشترکہ
تعاون کی صورت میں اجاگر کرنے میں دلچسپی رکھتا ہے۔
داتو سری اوتاما حاجی نے مسئلہ فلسطین سمیت
علاقائی اور بین الاقوامی مسائل پر ایران اور ملائیشیا کے مشترکہ موقف کی طرف
اشارہ کرتے ہوئے کہا کہ اسلامی جمہوریہ ایران کی طرح ہم بھی غزہ کے مظلوم عوام کے
خلاف صہیونی ریاست کے جرائم اور نسل کشی کی مذمت کرتے ہیں اور فلسطینیوں کو اپنا
وطن اور سرزمین چھوڑنے پر مجبور کرنے کے کسی بھی منصوبے یا اقدام کو مسترد کرتے ہیں۔
ملائیشیا کے وزیر خارجہ نے ایرانی صدر کو ملائیشیا
کے وزیر اعظم انور ابراہیم کی جانب سے اس ملک کے دورے کی باضابطہ دعوت دی۔
۔۔۔۔۔۔۔۔۔۔
110
