اہل بیت(ع) نیوز ایجنسی۔ابنا۔ عراق میں صدر دھڑے کے سربراہ مقتدیٰ الصدر نے آج (ہفتہ ، 15 اکتوبر) ایک بیان جاری کرتے ہوئے قندھار میں شیعہ مسجد پر دہشت گردانہ حملے کی مذمت کی ہے۔ انہوں نے ایران اور دیگر مسلم ممالک پر زور دیا کہ وہ جلد از جلد افغانستان کی صورتحال سے نمٹنے کے لیے کارروائی کریں۔
اپنے ٹوئٹر اکاؤنٹ پر پوسٹ کیے گئے ایک بیان میں مقتدا الصدر نے کہا کہ افغانستان میں تمام مذہبی فرقے سابق افغان صدر اشرف غنی اور ملک پر امریکی قبضے کے زمانے میں آزادانہ اور محفوظ طریقے سے رہتے تھے۔
انہوں نے مزید کہا: "طالبان کے افغانستان میں اقتدار سنبھالنے کے بعد ، ہم اس ملک میں بہت سے دہشت گرد حملوں کا مشاہدہ کر رہے ہیں جنہوں نے شیعوں اور ان کے مقدس مقامات کو نشانہ بنایا ہے۔"
مقتدیٰ الصدر نے اسلامی تعاون تنظیم بالخصوص ایران ، پاکستان ، سعودی عرب اور قطر سے مطالبہ کیا کہ وہ افغانستان کے شیعوں کی مشکلات کو کم کرنے کے لیے مناسب طریقے سے مداخلت کریں۔
انہوں نے کہا کہ اگر طالبان اہل تشیع اور افغانستان کے لوگوں کی حفاظت کرنے سے قاصر ہیں تو ہمیں فرقہ وارانہ جنگ شروع ہونے سے پہلے شیعوں کی مدد کرنی چاہیے۔
خیال رہے کہ جمعہ کی سہ پہر افغانستان کے شہر قندھار کی فاطمیہ مسجد پر دہشت گردوں کے حملے میں 40 سے زائد افراد شہید اور 70 سے زائد زخمی ہوئے۔
۔۔۔۔۔۔۔۔۔۔۔۔۔۔۔۔۔۔
۲۴۲
