حضرت علی مُرتضیٰ علیہ السلام فضائل و مناقب کی روشنی میں

اہل بیت(ع) نیوز ایجنسی ـ ابنا ـ

سعد ابن ابی وقاص سے روایت ہے کہ رسول اللہ (صلی اللہ علیہ و آلہ) نے حضرت علیؑ سے فرمایا: تم میری طرف سے اس مرتبے پر ہو، جس مرتبے پر حضرت ہارون علیہ السلام، حضرت موسیٰ علیہ السلام کی طرف سے تھے ،مگر بات یہ ہے کہ میرے بعد کوئی نبی نہ ہو گا۔ (بخاری و مسلم)

حضرت ابن عباسؓ فرماتے ہیں: علم کے دس حصے ہیں، ان میں سے نو حصے حضرت علیؑ کو دیے گئے اور دسویں حصے میں بھی وہ لوگوں کے ساتھ شریک ہیں۔ وہ فرماتے ہیں کہ جب کوئی بات حضرت علیؑ سے ثابت ہوجاتی ہے تو ہم اسے چھوڑ کردوسری بات اختیار ہی نہیں کرتے۔ اکابر اور جید صحابہ کرامؓ مشکل و دقیق مسائل میں حضرت علیؑ کی طرف رجوع کرتے تھے۔

حضرت زید بن ارقمؓ سے روایت ہے کہ نبی کریم (صلی اللہ علیہ و آلہ) نے ارشاد فرمایا: جس کا میں مولیٰ ہوں، علیؑ بھی اس کامولیٰ ہے۔ حضرت بریدہؓ سے روایت ہے کہ رسول اللہ (صلی اللہ علیہ و آلہ) نے ارشاد فرمایا: اللہ تعالیٰ نے مجھے جن لوگوں سے محبت کا حکم دیا ہے، ان میں سے ایک علی (علیہ السلام) بھی ہیں، یہ بات آپؐ نے تین مرتبہ ارشاد فرمائی۔

ایک موقع پر حضور  (صلی اللہ علیہ و آلہ) نے فرمایا! "علی (علیہ السلام) سب سے اچھا فیصلہ کرنے والے ہیں"۔ سیدنا حضرت علی المرتضٰی (علیہ السلام) غزوۂ تبوک کے علاوہ تمام غزوات میں شریک ہوئے، ہر معرکے میں سیدنا حضرت علی نے اپنی شجاعت و بہادری اور فداکاری کا لوہا منوایا بدر و اُحد، خندق و حنین اور خیبر میں اپنی جرأت و بہادری کے خوب جوہر دکھائے۔ ہجرت کی شب حضور  (صلی اللہ علیہ و آلہ) کے بستر مبارک پر آرام فرما ہوئے، اور آپؑ نے آخری وقت میں حضوراکرم  (صلی اللہ علیہ و آلہ) کی تیمارداری کے فرائض انجام دیے اور دیگر صحابہ کرام کے ہمراہ آپؑ کو "غُسلِ نبوی" کی سعادت بھی نصیب ہوئی۔

آپؑ "عشرہ مبشرہ" جیسے خوش نصیب صحابہ کرامؓ میں بھی شامل ہیں، جنہیں حضور  (صلی اللہ علیہ و آلہ) نے دنیا میں ہی جنت کی بشارت و خوش خبری دی اور خلافتِ راشدہ کے اعلیٰ منصب پر فائز ہوئے، آپؑ کو بچپن میں قبولِ اسلام کی سعادت نصیب ہوئی اور بچوں [مَردوں] میں سے سب سے پہلے آپؑ ہی دولتِ ایمان سے منور ہوئے، آپؑ کو "السابقون الاولون" میں بھی خاص مقام اور درجہ حاصل ہے۔

حضرت ابن عمرؓ فرماتے ہیں کہ جب رسول اللہ  (صلی اللہ علیہ و آلہ) نے مدینہ میں صحابہؓ کے درمیان مواخات قائم فرمائی تو سیدنا علی المرتضیٰ (علیہ السلام) بے ساختہ رو دیے اور کہا، اے اللہ کے رسول (صلی اللہ علیہ و آلہ)، آپ نے صحابہ کے درمیان مواخات کروائی، لیکن میری کسی کے ساتھ مواخات نہیں کرائی، تو اس پر رسول اللہ  (صلی اللہ علیہ و آلہ) نے ارشاد فرمایا: تم دنیا اورآخرت میں میرے بھائی ہو۔ نبی کریم  (صلی اللہ علیہ و آلہ) نے حضرت علی (علیہ السلام) کے بارے میں ارشاد فرمایا، جس نے علی (علیہ السلام) سے محبت کی اس نے مجھ سے محبت کی اور جس نے مجھ سے محبت کی ،اس نے رب العزت سے محبت کی او رجس نے علی (علیہ السلام) سے بغض رکھا، اس نے مجھ سے بغض رکھا اورجس نے مجھ سے بغض رکھا، اس نے اللہ رب العزت سے بغض رکھا ۔‘‘

رسول اللہ  (صلی اللہ علیہ و آلہ) نے ارشاد فرمایا: "اے علیؑ! اللہ تبارک وتعالیٰ نے تمہیں ایک ایسی زینت اور خوب صورتی سے نوازا ہے کہ اس سے زیادہ کسی زینت سے اپنے بندوں کو نہیں نوازا، وہ ان لوگوں کی زینت ہے جو اللہ کے نزدیک نیکو کار ہیں یعنی دنیا میں زہد و بے رغبتی اختیار کرنے والے ہیں۔ اللہ تعالیٰ نے تمہیں مساکین کی محبت عطا کی ہے"۔

اللہ کے رسول  (صلی اللہ علیہ و آلہ) کے اصحاب میں سےعلی بن ابی طالب (علیہ السلام) کے بے شمار فضائل و مناقب ہیں۔ اس کی وجہ یہ ہے کہ آپ سابق الاسلام ہونے کے علاوہ آنحضرتؐ کے قرابت دار ہیں۔ آپ کو تربیت کے لیے نبی کریم  (صلی اللہ علیہ و آلہ) کی پاک گود میں ڈال دیا گیا تو آپؑ کا مرتبۂ قرابت مزید دوبالا ہوگیا اور آپؑ کی شان میں اضافہ ہوگیا۔ سیدہ فاطمۃ الزہراء (سلام اللہ علیہا) کو آپ کے عقد میں دے دیا تو مزید فضیلت سیدنا علی المرتضیٰ (علیہ السلام) کے شامل حال ہوگئی۔

حضرت زید بن ارقمؓ  فرماتے ہیں: جو شخص یہ چاہتا ہے کہ میری طرح زندگی گذارے اورمیری طرح جنت الخلد میں رہے جس کا میرے رب نے میرے مرنے کے بعد مجھ سے وعدہ کیا ہے تو اسے چاہئے کہ وہ علی بن ابی طالب (علیہ السلام) کی اطاعت کرے، کیوں کہ وہ تمہیں سیدھے راستے سے ہٹنے نہ دیں گے اور تمہیں گمراہی میں داخل نہ ہونے دیں گے ۔

حضرت (علی کرم اللہ وجہہ) میں عجز و انکساری نمایاں تھی، اپنے عہدِ خلافت میں بازاروں میں تشریف لے جاتے، وہاں جو لوگ راستہ بھولے ہوئے ہوتے انہیں راستہ بتاتے، بوجھ اٹھانے والوں کی مدد کرتے، تقویٰ اور خشیت الٰہی آپؑ میں بہت زیادہ تھی، ایک بار آپؑ ایک قبرستان میں بیٹھے تھے کہ کسی نے کہا! اے ابو الحسن، یہاں کیوں بیٹھے ہوئے ہیں؟ فرمایا: میں ان لوگوں کو بہت اچھا ہم نشین پاتا ہوں، یہ کسی کی بدگوئی نہیں کرتے اور آخرت کی یاد دلاتے ہیں۔

ایک مرتبہ آپؑ قبرستان تشریف لے گئے اور وہاں پہنچ کر قبر والوں کی طرف متوجہ ہو کر فرمایا! اے قبر والو! اے بوسیدگی والو! اے وحشت و تنہائی والو! کہو کیا خبر ہے کیا حال ہے، ہماری خبر تو [تمہارے لئے] یہ ہے کہ تمہارے جانے کے بعد [تمہارے] مال تقسیم کر لیے گے اور اولادیں یتیم ہو گئیں، بیویوں نے دوسرے شوہر کر لیے۔ یہ تو ہماری خبر ہے، تم بھی اپنی خبر سناؤ! اس وقت کمیل بن زیادؓ آپؑ کے ہمراہ تھے، وہ بیان کرتے ہیں کہ اس کے بعد حضرت علی (علیہ السلام) نے فرمایا! اے کمیل، اگر ان (مُردوں) کو بولنے کی اجازت ہوتی تو یہ جواب دیتے کہ بہترین سامانِ آخرت پرہیز گاری ہے۔ اس کے بعد حضرت علی (علیہ السلام) رونے لگے اور فرمایا اے کمیل، قبر، اعمال کا صندوق ہے اور موت کے وقت یہ بات معلوم ہوتی ہے۔

۔۔۔۔۔۔۔

بقلم: ڈاکٹر آسی خرم جہا نگیری، مختصر سی تبدیلیوں کے ساتھ

۔۔۔۔۔۔۔

110